ఒత్తిడి వల్లే పాక్‌పై దాడి చేయలేదు: చిదంబరం సంచలన వ్యాఖ్యలు

2008 ముంబై ఉగ్రదాడుల తర్వాత పాకిస్థాన్‌పై ప్రతీకార దాడి ఎందుకు చేయలేదనే విషయంపై కాంగ్రెస్ సీనియర్ నేత, కేంద్ర హోంశాఖ మాజీ మంత్రి పి. చిదంబరం సంచలన విషయాలు వెల్లడించారు. తీవ్రమైన అంతర్జాతీయ ఒత్తిడి, అప్పటి విదేశాంగ మంత్రిత్వ శాఖ వైఖరి కారణంగానే యూపీఏ ప్రభుత్వం సైనిక చర్యకు దూరంగా ఉండాలని నిర్ణయించుకుందని ఆయన అంగీకరించారు. చిదంబరం చేసిన ఈ వ్యాఖ్యలు రాజకీయ దుమారం రేపగా, బీజేపీ ఆయనపై తీవ్రస్థాయిలో విమర్శలు గుప్పించింది.

ఒక వార్తా చానల్‌కు ఇచ్చిన ఇంటర్వ్యూలో చిదంబరం మాట్లాడుతూ 175 మంది ప్రాణాలను బలిగొన్న ముంబై దాడుల తర్వాత తనకు వ్యక్తిగతంగా ప్రతీకార చర్య చేపట్టాలనే ఆలోచన వచ్చిందని తెలిపారు. "ఆ దాడుల తర్వాత నేను హోం మంత్రిగా బాధ్యతలు స్వీకరించిన కొన్ని రోజులకే ప్రపంచ దేశాలన్నీ ఢిల్లీకి తరలివచ్చి 'యుద్ధం వద్దు' అని చెప్పాయి. అప్పటి అమెరికా విదేశాంగ మంత్రి కండోలీజా రైస్ నేరుగా నాతో, ప్రధానమంత్రితో సమావేశమై, దయచేసి స్పందించవద్దని కోరారు" అని చిదంబరం వివరించారు. ప్రతీకార చర్యల విషయంపై తాను అప్పటి ప్రధానితో, ఇతర ముఖ్యులతో చర్చించానని చిదంబరం గుర్తుచేసుకున్నారు. "ప్రధానంగా విదేశాంగ శాఖ, ఐఎఫ్ఎస్ అధికారుల సలహా మేరకే భౌతికంగా స్పందించకూడదని ప్రభుత్వం ఒక నిర్ణయానికి వచ్చింది" అని ఆయన స్పష్టం చేశారు.

చిదంబరం వ్యాఖ్యలపై బీజేపీ తీవ్రంగా స్పందించింది. ఇది చాలా ఆలస్యంగా చేసిన ఒప్పుకోలు అని కేంద్ర మంత్రి ప్రహ్లాద్ జోషి విమర్శించారు. విదేశీ శక్తుల ఒత్తిడితోనే యూపీఏ ప్రభుత్వం ముంబై దాడుల విషయంలో విఫలమైందన్న విషయం ఇప్పుడు రుజువైందని ఆయన అన్నారు. బీజేపీ అధికార ప్రతినిధి షెహజాద్ పూనావాలా మాట్లాడుతూ చిదంబరం ప్రతీకార చర్యకు మొగ్గు చూపినా, ప్రభుత్వంలోని "ఇతరులు" దానిని అడ్డుకున్నారని ఆరోపించారు. 

"అప్పటి కాంగ్రెస్ అధినేత్రి సోనియా గాంధీ లేదా ప్రధాని మన్మోహన్ సింగ్ ఈ నిర్ణయాన్ని అడ్డుకున్నారా? కండోలీజా రైస్ ఆదేశాల మేరకు యూపీఏ ప్రభుత్వం ఎందుకు పనిచేసింది?" అని ఆయన ప్రశ్నించారు. ముంబై దాడులతో పాటు సంఝౌతా ఎక్స్‌ప్రెస్ పేలుళ్ల విషయంలోనూ పాకిస్థాన్‌కు కాంగ్రెస్ క్లీన్ చిట్ ఇచ్చిందని ‘హిందూ ఉగ్రవాదం’ అనే కథనాన్ని ప్రచారం చేసిందని పూనావాలా ఆరోపించారు.